要更加堅強!! 加油!^^

真係辛苦哂朱先生, 因為今日要過大禮, 所以噚晚佢坦心及緊張到整晚無瞓, 然後今日帶備星期六所買的過大禮用品帶去我屋企送給我屋企人, 佢哋話要咩我哋已經買足, 結果仍然聽到啲怨言, (我哋唔太懂呢啲禮儀, 但係已經盡咗力!^_^) 之前又話無所謂, 原來係有所謂.
我聽到呢個comment, 我個心好痛, 因為見到朱先生盡心盡力去預備, 又緊張到成晚無瞓, 但換來就是這樣. (見到佢個樣謝哂, 眼仲有少少淚光)
好多謝同感激朱先生佢為我嘅付出, 雖然得不到別人的認同, 但係我係呢件事上面更加體會到佢對我的愛, 好感恩神預備佢係我身邊.
我哋已經盡咗力及盡咗我哋本份, 我哋無辦法去滿足所有人嘅要求, 唔好唔開心, 只要對得住神就得啦!^^ 大家加油及更加要堅強.
娶我真係唔容易, 我諗只有朱先生咁底得諗嘅咋!^o^

寫返近排所發生的事...

前日完咗祈禱會之後, 好感謝神俾我有一段時間可以係架車到同朱先生有個真情對話, 真係好耐無傾計啦! 雖然好似成日見, 但係次次都係有事務先出來, 次次都趕頭趕命. 直着呢次傾計, 神讓我哋發現, 原來我哋兩個同時間與神關係不斷倒退, 無好好靈修, 無好好祈禱, 以前我哋會一齊有靈修時間, 一齊有祈禱時間, 唔知幾時開始樣樣都停哂! 加上發現我哋自己都好少為對方祈禱, 無關心過對方嘅靈命, 仲話要係婚禮榮耀神將真愛信息帶俾屋企人及朋友, 但係未到婚禮都失哂見證及靈命死亡啦! ^_^"
多謝神及多謝不斷為我們祈禱的弟兄姊妹, 將我哋從魔鬼嘅陷阱拉返出來, 當晚我們各自回家向神認罪及求神赦免, 重新與神建立返關係, 現在我哋開始返每晚大家一齊有個祈禱嘅時間, 希望然後慢慢地可以開始返大家一起靈修嘅時間及多些靈上分享(不是只討論事務上的事), 求神幫助!BE STRONG!!! 朱先生大家加油呀!!^^

今日走咗兩架巴士, 追到我嘔血, 激死我倒頭來都係追唔到 , 最後要企係高速公路中心, 不斷聞着廢氣 , 受着風吹雨打, 企係到等多半個鐘先有巴士來, 上咗車未夠十五分鐘就到站, 點解明明十五分鐘嘅車程, 我要用成一個鐘頭等巴士嘅??......都好嘅吹咗啲涼風, 返工個人都清醒啲嘅!=p

今日好感恩, 阿long願意做我嘅祈禱伴侶, 自從完咗門訓課程, 都無機會搵到一個可以regularly大家可以一齊祈禱守望嘅姊妹, 真係好感恩, 今日神預備了這位姊妹給我, 每個星期有一次祈禱時間, 實在太好!! 加上原來大家都有同一個睇見, 好想攪一個父母離婚子女support group或者輔導, 因為大家都係過來人, 好想與人分享我哋嘅經歷同埋神怎樣醫治我哋嘅傷口, 雖然或者子女表面上無嘢, 但係其實佢哋係傷害得最深及最受影響, 我就係其中一個例子. 所以我哋兩個會不斷為此事禱告, 如果神喜悅, 求神讓我哋睇見祂所開出的路, 及神感動身邊弟兄姊妹給我們的印證.

之前都講過近排屋企遇到好多問題, 令我好煩好唔開心, 但係今日神為我打了支強心針, 再一次話俾我知佢係睇住我屋企嘅, 你認為無可能發生的事, 在神凡事都能.
今日係餐廳到食晚飯嘅時候, 好偶然地遇到我表哥, 見到佢一個人, 好自然地叫佢同我哋一齊坐一齊食飯, 一邊同佢傾計一邊心裡好感動, 因為以前呢個表哥因為濫用丸仔原估, 頭腦好唔清醒, 唔知自己做咩! 可以返返下工, 咩都唔講就走咗去, 所以一年轉咗廿幾次工, 每份都唔長, 加上家人覺得佢無得救, 之後信咗主又點, 神又係幫唔到佢, (當時我都好小信, 都覺得佢係咁嘅啦, 無得改). 但係神係好奇妙的, 你越覺得無可能, 神就話俾我聽係神手無嘢係唔可能. 今日我所見的表哥, 平易近人咗好多, 開心咗好多, 有講有笑, 講嘢無九唔搭8, 好清醒, 開始有一份穩定職業, 真係見到好大嘅進步, 同佢食完呢餐我感到好開心好溫暖, 神藉着他讓我開始重拾信心, 要努力為家人禱告!

嘩! 唔係啩!!

過去嘅星期六, 同GM們meeting完之後, 開始啲壓力又嚟啦! 嗰張list長到呢........, 都唔緊要, 但當我哋去draft當日個schedule時, 原來要將所有原本plan好或約好嘅時間(例如:化粧師, 攝影師, video)一一從新約過, 好煩呀! 又要由頭做過, 好唔想囉!

其實自己都唔想推咗啲事奉, 但係實在handle唔到啦! 之前忙教會嘢, 每個星期都有事奉, 跟住一有時間就去攪婚禮啲嘢, 買完嘢就走連拍拖時間都無, 更加無時間陪屋企人, 差唔多一星期同屋企人食一餐飯, 加上屋企人近排發生好多事, 想多啲陪佢哋, 希望弟兄姊妹明白啦, 辛苦哂! 多謝你哋幫忙!

又一超低能 勁攪笑之作 （ＩＩ）﹣巴士篇

噚日朝早，去到巴士站先落雨, 所以無帶到摭，不過好在件褸有帽，然後一邊凹住頂帽一邊等巴士，無耐，我見到我要搭嘅巴士轉左嚟緊，咁咪ＧＥＴ ＲＥＡＤＹ排隊上車囉，因為帶住頂帽關係,只係望到前面排隊的人，啲人上車咪跟住上車，但係一上到車發覺有啲唔妥，因為我見平時同我一班巴士的人點解無上車嘅，然後再望望後面就發現我要上嘅巴士原來係係後面，哎吔，ＳＴUPID ＭＥ上錯車呀！ 咁咪拿拿聲落車，但係架巴士巳經開車，心諗「幣啦！唔知會去咗邊tim架」當我唔知點算之際，車上有人見到我好想落車，跟住我聽到好多人叫“ＢＡＣＫ ＤＯＯＲ！ ＢＡＣＫ ＤＯＯＲ！” 司機聽到咁多人叫,就即刻停車，當時好感動呀但有少少尷尬，落車時即刻講“ＴＨＡＮＫ ＹＯU” 同 “ＩＧＯＴ Ａ ＷＲＯＮＧ ＢUS”，故事未完架！ 當我講完上錯車之後，就有幾個人拿拿淋跟住我落車，原來佢哋都係上錯車。哈哈哈哈．．．．．．超級勁攪笑！！

返到公司即刻打俾朱先生話俾佢知呢ＳＴUPID ＭＥ故事，笑死佢，佢話我咁多巴士趣事，儲儲埋埋可以出本書啦！！ 我相信一定可以囉！ 哈哈哈哈．．．．．．

咁都得??

真係好好笑, 但係會唔會嚇死人ga??

唔知有咩反應！１

呢幾個月屋企發生好多事, 件件新鮮, 件件甘, 仲要係每個星期都有新嘢，仲要唔係細件事，而係每一件事嘅決定都影響好大，仲有每一件事上面我都係咩都做唔到幫唔到，初時我會覺得點解咁嘅？？同埋好不安覺得自己好無用，亦都唔知點祈禱。
但當我慢慢思想這些事時，我心裡開始有平安，我越來越發覺同越來越見到神係我家人身上所作的，神不斷話俾我知“你係做唔到任何嘢，但係我係凡事都能的神，我係度睇住你屋企人，我亦都無輕看你之前所祈嘅禱，你企係呢度睇下事情慢慢嘅發展，相信我！”
雖然我心情仍然好矛盾，一方面好感謝神話俾我知佢嘅手係托住呢件事及賜給我有平安，但另一方面我個腦好空及無咩反應及感覺。
求神幫助，有信心ＢＥ ＳＴＲＯＮＧ地為祂見證呢件事！！

錫哂Bailey!!

唔好以為我錫哂樽酒呀, Bailey係我妹妹個囡囡, 佢真係好可愛, 唔見佢一兩日, 我就好掛住佢(所以朱先生有少少投訴, 有Bailey就唔記得咗佢, 但係佢無見Bailey一排都好掛住啦，不過無我咁激之嗎，哈哈＾＾）

以家成日學人講嘢，但係唔知佢講咩，佢講得最清楚係”嗰度”或者”嗰個”，問佢公公係邊呀？佢就會指住公公講”嗰個”，如果佢想叫你望住佢，就會指住你講”嗰個””嗰個”仲揮埋手直至你應佢為止，好攪笑，　當你應佢時，佢會笑住同你講”嗰個”．然後自己傻笑，好過引．

同佢玩完會好攰，但係會好開心！

仲有當佢望住鏡頭影相，會擺出唔同動作及怪樣（無人教佢，但係一影相就會咁），有相為證嘅！

多謝主日學老師

今日主日學老師令我以前所誤解的明白過來.
我以前成日以為聖靈有九個果子就是仁愛、喜樂、和平、忍耐、恩慈、良善、信實、溫柔、節制囉!! 原來係錯嘅, 其實聖靈結出嘅果子只有一個(當看英文經文, 你會發現個fruit字無s嘅, 係單數來的),
仁愛、喜樂、和平、忍耐、恩慈、良善、信實、溫柔、節制呢九樣嘢係係呢個聖靈果子裡面, 所以唔好以為等你去結咗仁愛果子先, 然後就結喜樂果子, 續個續個咁結, 而係結聖靈果子時會結哂呢九樣嘢出來.
唔知你明唔明我講咩呢? 但係我就明我主日學老師講咩啦! 多謝主日學老師clarify番我所誤解的, 上主日學真好!!

上個星期五

無時間日日寫blog, 所以現在寫番星期五晚發生咩事, 其實無咩特別事嘅, 但係好想講好開心可以同啲弟兄姊妹完咗主日祟拜領詩練習, 大家一齊去飲嘢, 雖然都好夜同埋第二日要返工, 但係我好珍惜呢段時間, 大家真係有個好開心嘅交談, 平時好少呢啲機會同埋我唔係次次可以join到, 因為大家各有各忙(尢其係我), 所以嗰晚傾到好夜, 傾到唔捨得走, 真係好relax囉. 不過, 朱先生就慘啦! 累到佢第二朝起唔到身幫公司做testing, 好在公司system無問題, 唔係就大鑊啦! Soli Soli 下次真係唔好咁夜啦! =p

爆朱先生鮮為人知嘅秘密

近排發現原來好多人都以為朱先生係獨仔, 其實唔係嘅, 佢有一個家姐同一個細佬, 家姐係香港, 細佬係溫哥華同佢一齊住, 但係唔多出街, 當啲弟兄姊妹朋友知道朱先生有家姐同弟弟大家都好驚訝, 但係我都好驚訝點解咁多人都唔知嘅?? 連啲好熟嘅朋友都唔知囉! mud真係咁秘密嘅咩?? 好啦! 所以我係度張朱先生鮮為人知嘅秘密, 公諸於世啦!!哈哈!

經典之作

我細細個睇過呢嗰video呀, 睇番都仍然覺得超"正"^^

一架就夠啦!

無論好天或落雨天, 好多時啲巴士都會遲到, 遲到唔緊要, 但係點解一嚟嚟三架巴士, 一走就走三架, 如果miss咗就有排等, 我一個人只需要一架巴士(無其他人等), 同一時間俾三架我無用嗰喎(上咗第一架車, 然後後面兩架無人座), 原來唔係每十分鐘一班, 而係每十分鐘三班, 點解會咁嘅?^^"好迷茫!!

呢個都好掂!!哈哈!!

呢嗰都係呀!!

好勁呀!!

佢哋真係好叻, 做得好似呀

啲人又會咁得閒?? 但係好好笑呀!

如果你係嗰個被玩嘅人, 會唔會有同一反應??..哈哈

又一超低能 勁攪笑之作 （Ｉ）﹣巴士篇

今日遲咗少少出門口, 所以好趕咁跑去追巴士, 但係卒之都追唔到, 算啦! 為有等下班, 個i-pod又無電, 見無人係個車站到, 一邊自己唱下詩歌仔(唱"寶貴十架"順便練下歌)一邊等巴士, 無幾耐話咁怏第二班就到, 當我想上車之際, 我發現自己唔記得咗攞銀包同車票, 拿拿淋跑返屋企攞番, 點知原來所有銀包車票留咗係朱先生到(噚日食飯時好心幫我袋住,但係我唔記得攞番), 身上一蚊都無, 唔知點算好, 好在我記起我有個好爸爸, 即刻叫佢起身車我返工, 好在無遲到.
都好感謝神未上到巴士前發現, 唔係係下個站俾人趕落車就超核突啦! 加上當做下運動(來回跑咗十幾個街口)減肥啦! 最感謝神係呢件事係發生係今日, 如果發生係前兩日嘅嘩大鑊啦(因為爸爸去咗旅行), 我諗我要行番工啦!
原本覺得自己好黑仔, 但當你嘗試去感恩, 原來會發現好多值得感恩嘅地方.
"再次多謝許牧師提醒"

終於誕生啦!!!

嘩! 估唔到污糟啲都會曉寫部落, 連我自己都估唔到, 真係一個天訪夜談, 希望呢個污污糟糟嘅部落唔會咁快發咗毛或者生哂蜘蛛網啦! 如果見我好耐無寫, 唔該提提我!! 升橋~~升橋~~

講得好啱!!

上個星期五晚受苦節祟拜, 好多謝許道宏牧師再一次提醒我, 當你越埋怨, 你就越多嘢埋怨, 狗屎垃圾都埋怨一餐, 但係當你越去感恩, 發生咩事都會懂得感恩.