過去幾個月，我大大經歷到天父嘅信實同恩典,我好想跟你哋分享。
係7月頭，我收到醫生消息話我驗血報告顯示出我肚裡面BB有可能有唐氏綜合症，要再等ultrasound 報告才可進一步證實，當時我同Alex聽到呢個消息好震驚，因為完全無諗過會發生係自己身上，當踏出診所門口我已經忍唔住喊，我好擔心肚裡面個BB，加上不斷諗咗好多負面嘅嘢，情緒勁低落，但天父好好，衪用詩篇146安慰我，天父話：“你們不要倚靠君王，不要倚靠世人；他一點不能幫助。他的氣一斷，就歸回塵土；他所打算的，當日就消滅了。以雅各的神為幫助、仰望耶和華他神的，這人便為有福！ 耶和華造天、地、海，和其中的萬物；他守誠實，直到永遠。”
過咗無耐，醫生通知我已經幫我約咗抽羊水檢查, 因為個ultrasound報告唔清楚，所以要抽羊水才可證實，因為得一個小時考慮，我哋完全好無準備下就去咗，係醫院等待期間，好多謝AFC同工們同幾個弟兄姊妹為我哋祈禱，係天父愛嘅保護下完成整個過程，亦沒有流產跡象（因為抽羊水有流產風險）。
報告要兩個星期後才有，係呢段等待期間，真係好難受，情緒高高底底，不時諗起都會喊同個心忍忍作痛，但係天父嘅安慰一路都無離開過我，係Revere Prayer Meeting（每月學生復興祈禱會）裡面天父又用146詩篇安慰我，個講員唔只讀一次，而係連續兩次，我好感動眼淚不停咁流，天父不停同我講你要讚美我，依靠我，我係信實架。
我以為自己因著天父嘅安慰，所以已經對天父滿有信心，一切已經交托，但係天父太了解我了，原來我心底裡最深處仍然有一樣嘢無交托，天父就係Restoration Worship（復修敬拜）裡面問我：“如果我真係俾一個唐氏綜合症嘅BB你，你願意降服嗎？”我即刻同天父講我唔願意，唔好呀! 天父! 我唔願意呀! 我一路狂喊一路向天父祈禱，原來我先知道我對天父仍然無信心，但係天父藉著學生們的經歷及我為他們代禱，天父慢慢軟化我剛硬的心，到最後我不知道從哪裡來的勇氣同天父講我願意，我亦明白到天父要將我最深處嘅恐懼都要拿走，讓我之後等待期間滿有平安及喜樂。
感謝神，最後報告話BB無事，係呢個經歷裡面，讓我,Alex,及仔仔嘅關係親密咗好多，多咗一起禱告時間，亦讓仔仔清楚知道自己會成為大哥哥，及神讓我明白到自己有幾軟弱，雖然我軟弱，但神可以將我哋嘅軟弱變為剛強，其實我在等待報告期間，神不斷給我感動為學生祈禱，因為我軟弱，所以我更明白到他們的軟弱，我可以身同感受為他們祈禱。
除了update 自己個人經歷外，我亦都想同你哋分享下我在使者的事奉，我係SFUCCF同DOUGLAS COLLEGE CCF 負責導師工作，過去幾個學期同他們經歷了很多神的恩典，同不同學生分享異像及信仰，讓我覺得自己年青好多，係呢班學生身上再次令我有返衝勁，佢哋嘅單純信心，不以褔音為恥，大膽分享神嘅愛，深深感動到我，話就話我係佢哋導師，其實我係佢哋身上學到好多嘢及反省好多嘢。
我亦負責TMC領導力訓練課程，係幫助從Grade 10 到Grade 12學生提升領導能力及技巧之外，亦培訓他們個人紀律，團隊合作精 神及學習建立人際關係，剛剛過去嗰屆學生在夜市攪了一個活動，去推廣“健康飲食“信息，亦好成功地為一個幫助青年人飲食失調嘅機構籌到二百元善款，其實最開心看見他們成長及團隊精神。
在此我想邀請你為我代禱, 醫生話我胎盤功能失調，輸送不到足夠營養給肚裡面嘅細朱B，但我好相信天父會保守BB，因為天父係凡事都能的神，請禱告記念BB可以在我肚裏面足月才健健康康出世。我應該在十一月頭會放產假，讓我可以在放假前可以好順利幫助暫代我位置嘅新同工識應工作, 多謝你哋嘅禱告支持!^^
