神所應許係唔會變！！

「是你應許」ＭＶ

不要忘記，神係每時每刻係我哋身邊！

我好喜歡呢兩套戲「隱形鬥室」及「恐懼森林」，呢首係「人生熱線」主題曲,好有意思，如果你未睇過呢兩套戲，直得一看！！

我只知道我有一位全知全能嘅神掌管緊我嘅生命^^

今朝早, 如常趕巴士上班, 我知道我成日橫過嗰條十字馬路係交通黑點, 所以每一次過呢條馬路都特別留神, 點趕巴士都好, 都要好小心過馬路, 今次都唔例外,好守規矩地等到轉咗行人過路燈, 然後, 再望清楚周圍無車再衝燈, 安全嘞, 先過馬路, 跟住過到一半, 好自然望望後面有無巴士嚟緊, 然後繼續向前行之際, 我聽到背後耳邊傳來好大聲急速殺車聲, 當我拎轉身見到我身處嘅處境, 我就大叫起嚟, 好恐怖, 原來有架車貼住我條裙停咗係到, 拎轉身時個司機位對正我, 如果我行遲咗一步,我相信我會無咗對腳, 如果架車無殺停, 佢個車尾會撞正我, 我相信以當時佢嘅時速撞到我嘅嘩, 我會彈到好遠. 嗰一刻我剩係識得大叫, 然後呆咗, 亦唔知自己幾時行咗過馬路, 我只見到停係到等轉燈嘅車裡面嘅司機呆咗望住我,有啲用手掩住個口望住我, 當時我真係唔識反應(三魂唔見咗7魄), 個司機亦唔知去咗邊, 我坐係個巴士站度, 過咗一陣, 先開始識驚, 驚到想喊! 不斷諗返當時情況, 不斷感恩神保守, 如果唔係我唔可以係到寫返呢件事出嚟.
意外嘅嘢無人能預計到, 你小心時, 有可能其他人唔小心, 生命就係咁話唔埋, 明天嘅事甚至下一分鐘嘅事你可以掌握到幾多呢?

狂野ＦUN ＦUN ＦUN ＳＨＯＷＥＲ ＰＡＲＴＹ

大家期待已久嘅Ｊ﹠Ａ ＳＨＯＷＥＲ ＰＡＲＴＹ昨日已經上演，亦在同一日裡完滿結束，多謝各方好友嚟臨及為我哋預備呢個咁狂野嘅派對^^，如果你錯過咗，咁就唔好意思啦！ 你ＭＩＳＳ咗好多嘢啦，同埋無得現場見到污糟啲同朱先生如何玩轉ＣＯＱUITLAM ＣＥＮＴＲＥ！！不過，我好好嘅，同你分享下少少片段啦！ ＨＥＨＥ＝Ｐ

初時我都好擔心好憂慮咁等待呢個ＰＡＲＴＹ，我亦俾朱先生有個心理準備呢個派對有可能會好殘酷，因為我仇家實在太多啦，好似個個都好想係呢個派對裡面報仇咁，好恐怖。不過, 朱先生話預咗𠺢啦，豁出去啦！其實我初時擔心佢唔玩得，但係佢都咁講，豁出去就豁出去，工作要盡力, 玩要盡慶嫲。ＨＡＨＡＨＡ．．^^
所以我哋抱住呢個心態係呢個ＰＡＲＴＹ玩個痛快，如我所料，我以前所出嘅ＧＡＭＥＳ，真的再重現眼前，仲改良咗，更富娛樂性，雖然我同朱先生被玩，但係我哋真係玩得好開心，亦見到其他朋友都玩得好投入（其實呢樣係我哋最想見到𠺢，大家好開心咁玩埋一齊．．．ＹＥＡＨ^^）真係好難忘！
尤其是係ＣＯＱ．ＣＥＮＴＲＥ到著住奇裝異服搵人攞簽名（有少少尷尬又驚俾實Ｑ趕走）但係當一大班人一齊去，同埋大家好努力幫手叫人拎簽名，好齊心（如果傳褔音嘅時候係咁就更好啦！^^) ，最攪笑就係吸引咗好多人圍觀及拍照，我諗我好啲無咩人會認得我，朱先生就慘啲啦！唔駛係呢度再出沒，我同朱先生講好彩我哋就嚟搬出ＶＡＮＣＯUVER, 唔駛再係ＣＯＱ．ＣＥＮＴＲＥ出現啦！哈哈！

辛苦一班攪手: 西姐、ＪＯＹＣＥ、ＤＯＭＩＮＩＣ、ＪＥＳＳＩＥ、ＨUGＯ，多謝你哋手下留情！HAHAHA....^O^

病 ~ 永不止息

好耐無寫blog 啦! 因為成日都覺得好攰, 無心機做嘢, 好想作病但係又作唔到出嚟, 好辛苦呀! 之前以為終於作到出嚟, 睇埋中醫, 飲埋藥, 心諗應該ok啦! 點知都係一樣, 不斷眼痕流鼻水頭痛, 攪到我唔知自己感冒定花粉症, 見到自己個殘樣, 好恐怖呀! 仲有一個月就做新娘子, 但係個樣咁殘, 都唔知點算好(尢其是近期facebook人哋tag我上去啲相, 好恐怖及慘不忍睹, 不過, 好多謝你哋俾我睇到自己有幾殘).
朱先生叫我咩都唔好理, 餘下呢個月攪好個身子先, 希望真係咩都唔好理啦! 不過, 真係咩都可以唔理咩????^^"
今晚再食多一次西藥, 早啲瞓, 希望可以快啲好返哂! ^_^

一個不離不棄嘅好朋友

係上個星期五晚, 總共有16個嚟自不同教會嘅團契一齊參加AFC攪嘅雀躍體驗Jubilization, 我哋個團契都有join.
我唔知其他團友們有咩得着, 但藉着當晚嘅8分半鐘嘅安靜禱告, 我係神面前放底咗好多嘢, 原來我好多不安好多憂慮係心裡面, 我好需要呢啲安靜時間, 好耐無咁安靜過啦, 雖然只有短短8分半鐘, 但係我可以好坦誠同神傾計, 好多謝神無離開過我, 只係我不斷ignore佢, 遠離佢.
神呀! 我係到啦! 我唔再做一個只係識得有事就祈禱,無事就唔理你嘅人, 我想好似亞伯拉干咁同你嘅關係係無所不談嘅朋友, 大家無嘢隱瞞. ^^