記住凡事禱告

今日崇拜馬傳道嘅信息再次提醒我無論大小事都要禱告, 記得剛剛信住嘅時候真係咩都祈禱, 例如唔見咗嘢呀, 剪頭髮呀, 買嘢呀, 林林嬸嬸嘅嘢都祈一餐, 禱告就好似同好朋友傾計咁, 無所不談同成日問佢意見, 嗰陣時真係同神關係好好好好, 唔係話以家好差, 但係真係好多時靠咗自己力量先, 然後無辦法先搵神.
好似近排嘅小小經歷咁, 就知道自己係幾蠢. 之前我唔見咗詩班嗰袋, 裡面裝咗好多好多歌書同歌譜, 當時好驚, 唔見咗會好唔掂, 即刻周圍搵, 我搵唒教會每一個角落同埋教會lost & found囉, 諗來諗去都唔知去咗邊, 明明放係詩班櫃裡面無帶到返屋企, 問哂所有人都話無見過, 好擔心好擔心, 搵足成個星期都搵唔到,真係要叠埋心水被人鬧. 但係有一日, 突然間自己先發現我一路都無為呢件事祈過禱無交過俾神, 神係無所不能嘅神呢架嫲, 點解咁蠢唔交俾神呢? 我即刻認罪再將呢件事交俾神, 祈完禱第二日, 即返團契嗰一晚, 竟然俾我見到個詩班袋好lonely咁企咗係地庫厠所隔離, 到宜家我都唔知邊個放係嗰度, 唔理邊個都好, 好開心見返我嘅老朋友, 多謝神聽咗我嘅禱告, 亦好多謝神藉着這經歷讓我更加明白馬傳道嘅信息對我嘅提醒, 我會好好記住!^^