懷著ＢＢ朱的心路歴程 之「入咗急症室」

11月9日

完咗崇拜，食完lunch，就返教會練歌，開始練歌之前，我開始肚痛，就即刻去厠所，肚好痛又去唔到，痛到一個地步標哂冷汗同有啲暈，好辛苦，但係如果我留係厠所咁耐會嚇親班team，所以走咗出去同班team講叫佢哋練住先唔好等我，我要辧大事（感恩係今次係Kathy領詩可以唔駛等我，唔係都唔知點算）

返入厠所，今次仲辛苦，唔但只肚痛仲嘔，嘔番成個lunch出嚟，後來終於去到厠所，去咗好多次，去到有少少虛脫好暈，好想打俾朱先生叫佢嚟帶我返屋企，但係個電話係出面，我又唔想離開厠所，卒之我係厠所渡過咗整個練歌過程，差唔多個半鐘頭，最後，我發現自己已經呵緊血，當時，我好驚唔知係唔係小產，我對住個厠所好驚好驚，勁祈禱，「哎呀！ 神呀！ 血呀！點算呀？ 我係唔係小產呀？？ 點算呀！」

後來朱先生接咗我走，返到屋企繼續係厠所渡過，一路都呵血，朱先生話送我去急症室，但係我死都唔去（因為急症室要等好耐之餘，個肚好痛所以我好唔想離開厠所，其實諗返起真係好危險，Soli BB朱同朱先生），直至到差唔多晚上11點，先肯去急症室（多謝Long俾咗個24hours　Nurse Line給我們，係個護士要我哋即刻去急症室）

去到急症室，真係好感謝神，無咩人排隊，又好快見到醫生（仲要係勁靚仔嗰隻，唔係剩係我覺得，連朱先生都覺得架．．哈哈！）啲護士又好nice同好照顧我，最感恩係BB朱無事，唔係小產現象，而係我用力過度出血，因為我食咗醫生開嘅止嘔藥，原來對我有好大副作用，令我呵過不停（開藥嘅醫生話個副作用只係會好眼瞓，但係對我會有咁大影響，大肚婆都係唔好食藥啦！！ soli BB朱 again)

其實好多謝一班同工們同有啲弟兄姊妹係背後為我同BB朱代禱，我同朱先生一入到急症室已經感受到神嘅Presence 係當中，亦好平安，多謝神保護BB朱，我同朱先生會更加小心照顧你／妳架！