好耐無寫Blog啦!

今日睇完我好友的BLOG, REMIND 咗我好耐無UPDATE自己個BLOG啦, 差唔多一個月先UPDATE 一兩次. 其實我儲咗好多相同好多生活嘅嘢寫, 但係因為一個"懶"字就攪到過哂氣=p, 加上好多人問我幾時先UPDATE下個BLOG, 仲唔update就罷睇喎, 駛唔駛呀? =p

好啦! 我知啦! 我會努力寫BLOG架啦! 請密切留意^^

就從bb朱出世開始update啦!^^

穿咗羊水啦！

今朝差唔多７點鐘穿咗羊水，嚇死我以為自己失禁，啲水不停咁流（淺粉紅色），超驚，不過好感恩，唔知點解今日朱先生完全唔知醒起身返工，所以我即刻拍醒佢叫佢打俾醫生，而我即刻走去沖涼預備自己，醫生叫我沖完涼打側瞓一個鐘，睇下ＢＢ朱係一個鐘頭內有無起碼郁最少４次，初時好驚，好無動靜，勁祈禱，最後都有郁咗好多吓，感謝主！

朱先生同我一齊祈禱，等待陣痛，因為我真係好驚，唔知自己忍唔忍到，我好想natural birth呀，但又好驚，想啲陣痛快啲嚟（因為穿咗羊水，始終快啲生好），但又好驚好痛頂唔順，超矛盾。

等下等下又幾個鐘，等下等下又幾個鐘，到而家都未痛，所以再打俾醫生問下點算，佢話唔駛驚，如果啲羊水無變色，加上ＢＢ仲有郁，係ＯＫ架，如果再無陣痛咁點呀？佢話醫生慣常俾２４小時孕婦自己可唔可以自然產生陣痛，如果到第二朝都無，就要吹生啦，願神的手托住整個生產過程。

醫生叫我行多啲，可以幫助陣痛同生產，所以朱先生同我落街行咗成個鐘，但係都係無咩反應，究竟係我忍得痛，定係真係無呢？　如果仲未有，我諗我會再落街行下，ＢＢ朱，努力呀！媽媽同爸爸等緊你出嚟架。